النهضه ...

النهضه بنت جميله راكبه عجله ببدال بس الجنزير واقع !! وانا على ( الحياد ) حتى ( الممات ) والتعدديه الحزبيه جابتلى نزله معويه
والنخبه ولاد ال .... النخبه نازلين فى بعض خناق ومات الاتفاق !! وبلدنا على الترعه بتغسل وتكوى ومنذ بدايه اعلان الحرب على النهضه الى نهايه خط المترو والركاب واقفين مستنين اتوبيس هيئه النقل العام المضرب عن الطعام من أجل توفير حياه كريمه لكل طبيب ؛ و ( العادلى ) اتحبس اه بس فكره لسه حر !! وعلى رأى المثل تخدعنى مره عيب عليا تخدعنى مرتين عيب عليك والريس معانا بس بقليه صحيح الاستثمار مطلوب لكن القمع مش مرغوب عشان الرسم ممكن ( يندبح ) لكن الدم محال ( يتمسح ) واللى اتلسع م الشربه ينفخ فى مشروع النهضه وانا عن نفسى ما اتلسعتش بس المشروع سخن اوى !! والابراص كترت اوى وعماله تنفخ فى النار
فا ينموت ( الابراص ) وناخد حسنات يا نموت ( الحراس ) ودى فيها خراب البلاد ..!

مصر يا ما يا ( تكيه ) .. بهيه سابقا !!

مصر يا ما ... يا ست الكل .... ياااااااامصر هتقومى ولا اعملك ( عارضه ) ! الاصل فى الاشياء ( التناحه ) ما لم يرد ضمير ويا بخت من زار و ( تقل ) عشان الجو بره ساقع اوى و ( بارد ) زى موظف الحكومه ثورتنا وصلت ( الكواكب ) وما وصلتش ( المكاتب ) فارجوك عزيزى المواطن اخلع تى شيرت ( 25 ) عند دخولك اى باب حكومى والبس عباءه سيدنا ( ايوب ) مصر يا ما يا ( تكيه ) الكوسه اساس الترقيه ( بقولك ايه هوه المدير مشى .... اه .... طب  انا هخلع بقا ..... ماشى بس متنساش تلبس بدله بكره وتحلق دقنك ) فاختيار رؤساء الاقسام يأتى حسب ( الحسوكه ) وصله الارحام ! وتختلف معايير الحسوكه من وزاره لاخرى ( راجع المعايير والمقادير فى كتاب الشيف شربينى ) وبين مرتب الطبيب ومرتب الساعى الفرق ( خفيف ) سكر زياده ! فا متستناش قطار النهضه والطفره العلميه لان الطريق واقف والمرور قاعد ومن ابناء العاملين ل لواءات الجيش المتقاعدين الميرى عارف هوه رايح فين ولا عزاء لابناء المساكين , لواء الجيش المتقاعد سلاح ذو ( مرتبين ) طب انتا بتشتغل ايه هنا يا عم اللوا ... لا يابنى دنا بشتغلكوا !!
المهم مش هنقف عند الحته دى كتير هنقف قدام شويه عشان الطينه , وبس اما تيجى وانا احكيلك ع اللى جرى ... وامسح دموعى (بتقاريرك )ع اللى جرى ... فى بلدنا تعرف ميعاد التفتيش من قبلها بيجى اسبوع ومن يتفاجىء بميعاد التفتيش هم اصحاب الزياره فقط !! والسر فى المناقصات والدورات واللى تحت التربيزات ولو ما دخلتش معانا فى اللعبه هنكتب فيك ( شكوى كيديه ) ونحولك للتحقيق ! هتفتح مخك هتاكل علاوات ومكافأت وسفريات .... ااااااااه يا مؤسسات مليانه فساد هسيبكوا انا بقا عشان يدوب احضر البدله واخد دقنى عندنا تفتيش ( مفاجىء ) بكره م الوزاره !!

الصرف الصحى

_ سلامو عليكو ازيك يا حاج
بتاع الفوانيس : وعليكم السلام اؤمر يا بنى
_ الامر لله يا حاج عايز فانوس ضخم وكبير كده وحلو
بتاع الفوانيس : ايه رايك فى ده ؟
_ حلو بس مفيش واحد اكبر ؛ الله فى واحد كبير وحلو هناك اهوه ايه ده الله ده شبه ....
بتاع الفوانيس مقاطعا : ايوه يابنى بالظبط هوه ؛ احنا عاملينه على شكل ( ماسبيرو )
_ طب بكام ده يا حاج
بتاع الفوانيس : لا يا بنى ده مش للبيع ده لامؤاخذه عاملينه ( حمام ) للصنايعيه اللى شغالين هنا
_ !!!!!
كل سنه وانتوا طيبين الحر داخل ورمضان داخل وانا من هدومى خارج و ( العبادات ) داخله و ( الهيافات ) برضه داخله وصحيح الشياطين ( متسلسلين ) بس الاعلاميين ( سايبين ) !! وانا قلت ابعد عن الضحك شويه واكتب حاجه عن الروحانيات والايمانيات . ايه ده ايه الريحه النتنه دى ( اقفل رجلك يا جعيدى ) والله مانا ده الاختراع الغريب بتاع ( لوجى بيرد ) ده مطلع ريحه وحشه اوى ؛ طب اقفله او افتح البلكونه ؛ لامؤاخذه كنا بنتكلم فى ايه .... اه الايمانيات والروحانيات ؛ يادى النيله ثانيه واحده بجد الريحه لا تطاق ... ايه ده قبر !!! من زمااان واحنا عايشين فى كاميرا خفيه اعلاميه ( وخلى خلى بالك هنغشك وانت ولا على بالك ) وانا فاكر زمان بابا حكالى ان مصر مره كسبت حرب الصبح فى الراديو وبليل طلعت نكسه !! ورغم ان ( نكسه ) 67 تحولت الى 73 الا ان ( وكسه ) الاعلام تحولت الى ( نكسه ) اخرى ؛ ويتلون الاعلام (بالوان ) الحكام السبعه ومن ساعه ما بدلنا المراحيض بوزاره الاعلام والمجارى طافحه ومغرقه البلد وعلى بال ما ( تامر ) يجى من ( غمره ) احكيلكوا قصه امبراطور الاعلام بس ( خلى الثوار اللى جنبك يوطوا صوتهم شويه ) عشان تسمعنى كويس ؛ ( روبرت مردوخ ) انه يملك حوالى 40 % من صحف بريطانيا مثل التايمز والصن و نيوز اوف ذى وورلد كما يملك حوالى 50% من محطه ( سكاى ) التلفزيونيه البريطانيه كما يسعى الى شراء المزيد ده غير اللى فى امريكا واستراليا ودول تانيه ماذا يريد هذا الصهيونى الماكر ؟! انا عارف هوه عايز ايه ( انا عارفك كويس يا عدوى وهتلاعبنى بالنسب هلاعبك ) ومن ( ام احمد ) اللى ماتت عشان معهاش فلوس ( غسيل الكلى ) الاسبوعى الى شعب بحاله بيموت من ( غسيل المخ )
اليومى المجانى احب اقولكم ما تخافوش الكدب ملوش ..... اسكت مش طلع ليه وبيجرى زى القرد اهوه وعمال يتنطط فى الاستديو شمال ويمين ! وعندما تتحول قناه تلفزيونيه الى عشه ( بط ) فوق السطوح ! فلابد من ( وقفه ) العيد الصغير ان تتغير وتصبح ( قعده )
للمطبلاتيه وبين ( المطبلاتيه ) و ( الثورجيه ) يقتح الله فكلاهما يتقارب فى المقدار ينعكس فى المسار وبعد زياره ( المشير ) للقاهره اليوم وخلال لقائه مع ( الرئيس ) لبحث سبل التعاون بين البلدين تم وضع خطه لتطهير الاعلام عن طريق تطوير مجرى الصرف الصحى وتوفير ( قصريه ) اضافيه لكل مذيع ورفع التكلفه عن شرائط ( الانتوسيد ) وتوفيرها مجانا لكافه القنوات والمحطات و ........
ايه ده صحيح احنا مش كنا بنقول هنتكلم عن الايمانيات والروحانيات ؛ يلا اهوه ( تامر ) وصل بالسلامه اهوه ربنا يحرقه يكلمكوا هوه بقا على بال ما اقوم انا اعمل زى الناس ما بتعمل لاحسن بطنى قلبت م المقاله دى وماتنسوش لما ( تامر ) يخلص تشدوا ( السيفون )

بابا جاب موز
لما النسيم بيعدى بين شعرك حبيبتى باسمعه ( بيسب الدين ) ! ؛ لطوال سنوات نبحث مع الشرطه عن الحب وعلى مر السنين ( العجاف) والحكام ( اللطاف ) تجمدت قلوبنا وتبلدت مشاعرنا وتجمدت ( الاحاسيس ) بفضل فخامه ( الرئيس ) ووجدنا الحب ( حمضان) ماما ( سوزان ) نسيته بره التلاجه كويس انها ما افتكرتهوش وحطته فى الفريزر كان زمانه ( اتجمد ) مع الارصده ! والليله الحنه وبكره حنه برضه لغايه ما يلاقوا عريس جديد اصل العريس طفش بلاد بره يشوف عروسه تحبه ويحبها من غير ضرايب ولا دمغات ! لفترات رئاسيه عديده نبحث عن الحب بطرق عديده ومختلفه ذهب اخى ليبحث عنه فى طابور الجمعيه وذهب اخى الاخر ليبحث عنه فى طابور البنزين اما ابى فذهب ليجده فى طابورالمعاشات وبالنسبه للحاجه الوالده لمت الجيران وراحت تدور عليه فى طابور الانابيب وانا المفروض كنت ادور عليه فى طابور العيش بس للاسف كان عندى طابور صباح ويتناسب ( الطابور ) تناسبا طرديا مع ( الخابور ) وكما قال الشاعر : اذا الشعب يوما اراد الحياه ( خليه يقف فى الطابور ويستنى دوره ) وبسؤال شاهد عيان قال : انا شوفته بعينى بيغرق فى البحر والسؤال هنا هوه غرق نتيجه خروج غير شرعى ولا عباره ؟؟! ( اوعى تكون عباره من اللى بيغرقوا ها ها ها ها ) وبسؤال الشاهد الاخر قال : انا شوفته بعينى بيولع وهوه راكب قطر الصعيد ! فى وطننا اصبح البحث عن ( الحب ) كالبحث عن ( وظيفه ) ولما نزلت من الاتوبيس تأكدت تماما انه قد اختفت كل مشاعر الحب والعشق والود والاخلاص والمحفظه !! نحن شعب اطيب من الطيابه وقلبه لبن حليب صافى فبرغم قسوه وظلم ( المخلوع  ) كلنا بكينا وتأثرنا عندما رأيناه نايم على سريره فى القفص ويبحث عن شىء فى مناخيره ولا يجده ومش كده وبس بل تطوع بعض الشباب الطاهر اللى لسه مستحمى وغاسل ايده بالعديد من الصوابع للبحث معه ؛ نحن شعبا يفتقد الحب كافتقاد التلاجه للحمه نفتقد المعنى الحقيقى للاب الرئيس ؛ عايزين الرئيس اللى ماما تصحينا على صوت رجليه وتقولنا ( اصحوا يا ولاد بابا جاب موز ) ؛ هتفدر يادكتور تتدفينا وتطبطب علينا وتمسح دموعنا وتأكلنا الموز ولا هتلبسنا وتزحلقنا بالقشر ؟؟!

رساله عبر الحدود
اللى اتلسع من ( الاخوان ) ينفخ فى ( مشروع النهضه ) !!!
اوافق على حل تلت البرلمان او البرلمان كله ان امكن  ؛ واوافق على الغاء قانون الضبطيه القضائيه وعوده قانوه الطوارىء ؛ وعشان الثوره ( تتكمل )
اوافق على الاعلان الدستورى ( المكمل )
وفى الختام حابب اققول ( اكنس بيتك ورشه وخلى ( الفلول ) يخشه )
ابنك المخلص // سيد ( المنوفى ) ...

العار

العار!!

صباح الخير ؛ صباح الزفت والقطران على دماغك فين مصروف البيت ؟؟!!
هكذا ابدأ يومى مع زوجتى حبيبتى ام عيالى الغاليه بنت ال... غالى ؛ وهكذا اكون مسيطر فى بيتى تماما كما يسيطر الرئيس على الدوله !! ففى بلادنا يعطوك الرئيس مثل كوب الحليب ( منزوع الدسم ) ؛ عايزين رئيس خدوا ( الرئيس ) بس من غير ( ترخيص ) ؛ مصر بعد الثوره رئيسها ( منتهى الصلاحيه ) ؛ و( الصلاحيات ) فى ( الملاحات ) ؛ والملاحه والملاحه والمجلس ده بجاحته بجاحه ؛ والثوره تعترض ؛ يبقا حقها ولا مش حقها ؟! حقها ولا مش حقها ؟! لما دخلت اللجنه ملقتش غير اتنين ( بلوفر ودكتور ) والطرف التالت هوه اللى فاز ؛ ( نيولوك ) للاعلان الدستورى  المكمل والاستفتاء عليه على شكل اعاده بين مرشحين ؛ ومرسى ( نعم ) وشفيق (لا ) ؛ وانتصر الطرف التالت فى غزوه الصناديق ؛ ومازال المجلس ( بيتمقلس ) والشرعيه الثوريه فى ( النمليه ) ؛ ومن حل ( البرلمان )  لحل ( الاخوان ) الثوره مش فى ( امان ) ؛ ومازال العسكر يسكن فى الدور التانى ( ايجار قديم ) ومصر فى الارضى ؛ ومازال المجلس دوله فوق ( الدوله ) واخدينا ( مقاوله ) ؛ هذا الاعلان الدستورى يمكن تطبيقه فقط داخل حدود جمهوريه المنوفيه !!