الازدواجيه

( النطاعه ) كنز لا يفنى ! ؛ وانا من يوم حفل ( ازدواجى ) لحد انهارده وانا جوه منى اتنين ماشيين فى اتجاهين واحد على رجله والتانى راكب سياره ؛ فانتبه عزيزى المواطن فالسياره ترجع الى الامام ! وانا واخويا على ابن عمى وانا وابن عمى على اخته اصلها مراتى ؛ وبسؤال جدى عن حقى فى ميراث أبى .. رد قائلا : ابقا تعالى وانا اقولك هوه فين !! ( ايه ده يا جدى انت ليك فى الحاجات دى ) .. وعندما ذهب اليه اخى الاكبر .. قال له جدى : ابقا تعالى زى اخوك وانا اقولك هوه فين !! ( لا بقا يا جدى انت شكلك بقيت وزير ) ؛ فتأكدت ان العيب فى ( الاسماء ) وليس ( الانتماء ) فهناك فرق بين وزير تموين تحركه ( النخوه ) ووزير اعلام تحركه ( الشهوه ) ؛ و الفلسفه زى الخمرا بتدفى وبرضه بتذهب العقل ؛ ومن أفلام يوسف شاهين لحوارات السيد الرئيس ذهب العقل ولم يعد !! وأنا كان نفسى ( أغير ) لابنى مستقبله بس أمه ( غيرتله ) ! وعندما اجتمع ممثلى الدول الثلاثه قال الأمريكى : عايز اعرف ازاى نسيطر على العالم عسكريا؟ .. وقال الصينى : عايز اعرف ازاى نسيطر على العالم اقتصاديا؟ .. وقال المصرى : عايز اعرف مين زار بروفايلى ؟! ؛ وأنا مع العيله شخص وعلى الفيس شخص تانى خالص ؛ فاحذر عزيزى المواطن من اضافه الشطه فى السندوتشات والعيله على الفيس ؛ فالأولى تجلب ( البواسير ) والثانيه تجلب ( الخوابير ) ! فقد يراك عمك اللى انت بقالك شهر بتلم منه تبرعات لجارك السورى بتشير صور لروسيا !! فهناك فرق بين الترضى والتشيع ؛ واسمع كلامك اصدقك اشوف امورك استعجب ؛ وانا ( مش لبيرالى بس بحبهم ) ..وا كان نفسى اكون مسؤل كبير فى الدوله لكن أمى قالتلى الكدب ملوش رجلين !!  فلا تكتئب عزيزى المواطن فالعيب مش فيك
العيب فى المسؤل اللى دايما بيقول كلام فى التلفزيون وتخش تفتح الفيس تلاقي فيديو قديم ليه بيناقض فيه نفسه ؛ فامامك عزيزى المواطن حل من اتنين ان تتقبل الازدواجيه بروح رياضيه ؛ او تقفل حسابك على الفيس !!